Azken berriak

 

2017, Otsailak

Inauteri aurreko giroa da nagusi La Salle Legazpin koreografien entseguetan

Inauteri aurreko giroa nabarmena da jada La Salle Legazpin. Batzuk hustu dituzte ganbarako kaxa zaharrak 60ko look-aren bila, beste batzuk egindako azken orduko jantziren bat eskuratzearekin konformatu dira eta bada irudimenak lagunduta orduak igaro dituena josten eta eskulanak egiten ere aurtengo inauteriez gozatzeko esperantzarekin, Dagoeneko armairu gehienetan dena prest dago Ostegun Gizenerako eta Ostiral Meherako. Pintzesak, piratak, Ninja dortokak, drakulak, Txanogorritxuak edota cowboyak. Guztiak zain norbaitek bizia eman diezaien ordu batzuez.

 

Bitartean, ikasleak gogor ari dira entsaiatzen ostiralean eszenaratuko dituzten koreografiak. Zerrenda luzea aukeratu dute dantzatzeko, originaltasuna, umorea eta kolorea uztartuz.

 

Txikienek, Haur Eskolakoek, ostiral goizean ospatuko dute jaia. Arratsaldean, berriz,2 urte eta Haur Hezkuntzakoen eta Lehen Hezkuntzakoen txanda izango da.

H.H.ko ikasleen festa Beloki frontoian izango da eta L.H.koena Ispilla kiroldegian. Bi guneetan jaia 15:00etan hasiko da. Edonola ere, L.H.koak 14:45ean eskolako patioan bilduko dira eta desfilean joango dira kiroldegira. HHkoak, berriz, frontoian bertan elkartuko dira.

 

Aurreko edizioetan bezala, oroitzapenerako hainbat irudi utziko dituzten inauteriak izango dira.

Mexiko oso osorik, mariatchien doinupean eta Frida Kahloren hilezkortutako begiradapean

Literaturari esker, irakurleak ehunka bizitza bizitzeko aukera duen bezala, haurrei mundu ezezagunetako ateak zabaltzen zaizkie irudimenari, musikari eta zaporeei esker. Haur Hezkuntzan urtea Mexiko ezagutuz hasi dute eta horretarako hango kultura ordezkatzen duten elementu  eta tradizioetara jo dute ikasgelan. Mariachien doinupean eta Frida Kahloren hilezkortutako begiradapean barneratu dira herrialdean. Izan ere, besteak beste, birziklatutako materialarekin marakak egin dituzte eta XX mendeak Latinoamerikak eman duen margolari eta olerkari ezagunenaren autorretratuak ikusi dituzte.

 

Gastronomia izan da landutako beste aspektu bat. Ahuakateak, tomateak eta tipulak hartuta, beste osagai batzuen artean, mahaian gozatzen duen edonork txalokatzeko moduko guakamole saltsa prestatu dute.

 

Papera eta buztinarekin kaktusak ere egin dituzte Mexikoko paisaia irudikatzeko eta deskubritu dute Katrina ez dela urakan suntsitzaile bat bakarrik. Catrina, “c”-kin, Mexikon heriotza sinbolizatzen duen pertsonaia da.

 

Esperientzia mexikarrei ahotsa jarri dietenak noiz edo noiz herrialdea bisitatzeko aukera izan duten gurasoak izan dira. Gelara gonbidatu dituzte euren bizipenak kontatzera eta halaxe egin dute. Eskerrik asko parte hartzeagatik!

 

Guraso eta irakasleei esker, haurrek asko ikasi dute. Eta Atlantikoa gurutzatu beharrik gabe. 

 

2017, Otsailak

 

Barnetegia Sastarrainen: Konexioa naturarekin eta ikaskideekin  

 

Errutina eta eguneroko bizitzaren erritmo bizkorra puskatzea, eskalada, ekitazioa, espeleologia, arku-tiroa edo slackline-a praktikatzeko, hain da proposamen gustagarria goizeko iratzargailuaren alarmak ere ez duela inor amorrarazten. Ondo dakite hori DBH2ko neska-mutilek, Zestoako Sastarrain Baserri Eskolan berriki egindako egonaldiaren ondoren.

 

Astelehenetik ostegunera egindako irteera ingurumenarekin eta gainerako ikaskideekin loturak sendotzeko gonbitea izan da, gela barruko obligazioetatik urruntzen diren jarduerak eta esperientziak partekatuz.

 

Ekimenak bilatzen du gazteen artean euskararen erabilpena sustatzea, euren arteko harremanak indartzea eta talde lanerako giroa hobetzea. Finean, ikaskuntzarako testuinguru berriaren baitan kokatzen da proposamena non ikasleen esperientziak konpetentzien garapenera bideratzen diren, etorkizunari aise aurre egiteko gai izan daitezen.

 

Sastarrrain eszenatoki aproposa izan da dibertitzeko, ezagutzeko eta elkarbizitzen ikasteko.

Izan ere, gauzarik garrantzitsuenak ez dira Google-en bilaketak eginda ikasten.

2017, Otsailak

 

The Orchestra

 

1.mailako ikasleek musikari buruzko proiektu bat aurrera eraman dute ingeleseko saioetan. Instrumentuen ezaugarriei buruz eta beraien kokapena orkestra batean ikasi dute. Baita musikari famatu batzuen lanaz gozatu ere. Bukatzeko proiektua Rossiniren "gallop" izeneko pieza famatua interpretatu zuten.

Look at our little musicians!

2017, Urtarrilak

 

La Salle Legazpik Bakearen Eguna ospatu du emakumeen aurkako indarkeriaren bukaera aldarrikatuz

 

Aurreko urteetan bezala, erresistentzia baketsuaren eta biolentzia ezaren irudi den Mahatma Gandhiren heriotzaren urteurrena gogoratuz, La Salle Legazpik Bakearen Eguna ospatu du gaur.

 

Edizio honetako gai nagusia emakumeen aurkako indarkeriaren desagerpenaren aldarrikapena da. Ikasleakhainbat ekintza egin dituzte eskolan eta goizerdian, 11:30ean, Zelai Arizti Parkera hurbildu dira. Gaztetxoek parkeko zuhaitzetatik genero biolentziaren kontrako leloak eta horma-irudiak zintzilikatu dituzte. Txikienek lorategia apaindu dute landare eta marrazkiekin, tratu txarren gaitzespen keinu gisa.

 

Ekintzari amaiera eman zaio manifestu bat irakurriz eta Mikel Markez eta Aire ahizpen “Konplize ditut eta” abestia kantatuz.

 

Modu honetara, La Salle Legazpik bat egin du Unescoren aitortza duen eta 1964tik ospatzen den Bakearen eta Biolentzia ezaren Eskola Egunarekin.

2016, Abenduak

 

La Salle Mendi Taldea Irimora igoko da Egea eta Kortazar atletekin eta han jaiotza jarriko dute

 

Igande honetan, hilaren 18an, La Salle Mendi Taldea Irimora igoko da eta mendizaleek tontorrean jaiotza jarriko dute. Jada tradizio bihurtu da urteroko irteera hau. Jaiotza jarri ostean, Meakako elkartean hamaiketakoa egingo dute partaideek urtea agurtzeko.

 

Oraingoan gainera mendiko lasterketetan ibiltzen diren eliteko bi atletekin egingo dute igoera. Aritz Egea eta Oihana Kortazarrekin, hain zuzen. Pozik hartu dute Irimora joateko gonbidapena eta horretxegatik omenalditxo bat egingo zaie. Aurtengo azken irteera izango da igandekoa.

2016, Abenduak

 

Ipuinak kontaketaren xarma

 

LH 1eko ikasleak Zumarragako Liburutegian izan berri dira ipuin kontaketa saio batez gozatzeko. Liburutegia ezagutzeaz gain, ipuin kontalari bat zuzenean entzuteak duen xarmak ez duela inor desengainatuta uzten ikusi zen. Amaiera arte aho zabalik mantentzea lortu zuen kontalariak eta orain haurrek badute besteei kontatzeko ipuin bat. Gabriel Arestik zioen “nire poesia oso merkea da, herriaren ahotik hartu nuen debalde, eta debalde ematen diot herriaren belarriari”. Ipuinak ere bizirik mantentzen dira ahoz aho ibiliz gero, horregatik orain umeak ipuinaren antzezpena lantzen ari dira.

Plataformak

 

Multimedia